"Улаанбаатарын унаганууд" баг Монголын Оюутны Сагсан бөмбөгийн Холбооны Оюутны лигийн тэмцээнийг амжилттай үргэлжлүүлж байна.
MCBA-Монголын Оюутны Сагсан бөмбөгийн Холбооноос зохион байгуулдаг Оюутны лигийн тэмцээний 2021-2022 оны шинэ улирал үргэлжлэн явагдаж байна. Энэ жил Оюутны лигийн тэмцээний 21 жилийн ой болж байгаа бөгөөд 35 их, дээд сургуулийн 57 багийн 1000 гаруй тамирчид оролцож, цар хүрээгээ уламж тэлсэн Монголын хамгийн олон баг тамирчидтай лиг болсон байна.
2021-2022 оны “Оюутны лиг”-ийн нээлтийн арга хэмжээ 11 сард Олон Улсын стандартад нийцсэн Монголын анхны Мөсөн өргөө болох Steppe Arena боллоо. Их, дээд сургуулиуд өөрийн багийг ивээн тэтгэж дэмжихээс гадна пүүс компани, хувь хүмүүс ивээн тэтгэж “Оюунлаг тамирчин”-г нэмэгдүүлэхэд томоохон хөрөнгө оруулалт хийж эхлээд байгааг зохион байгуулагчид нь цохон тэмдэглэсэн байна.
Бүтэн жилийн туршид үргэлжлэн явагдах “Оюутны лиг”-ийн тэмцээнд ахлах багш М.Баярхүү дасгалжуулагчтай ОУУБИС-ийн “Улаанбаатарын унаганууд” эрэгтэй баг тоглож байгаа бөгөөд нийт 18 тоглолт хийхээс одоогийн байдлаар 3 тоглолт хийж 2 хожил, 1 хожигдолтой тэмцээнээ үргэлжлүүлж байна.
"Улаанбаатарын унаганууд" багийн 3 дахь тоглолт
2021.12.15-ны өдрийн 3 дахь тоглолтонд МУБИС-ийн багийг 67-76 харьцаагаар хожсон. Уг тоглолтонд оюутан Б.Бямбадэлэг (25 оноо), Э.Бат-Оргил (16 оноо) нар хамгийн өндөр оноог багтаа авсан байна.
"Улаанбаатарын унаганууд" багийн 2 дахь тоглолт
2021.12.09-ний өдрийн 2 дахь тоглолтонд Мон-Алтиус Дээд Сургуулийн багийг 73-78 харьцаагаар хожсон. Уг тоглолтонд Б.Бямбадэлэг (26 оноо), Д.Отгонбат (17 оноо) нар хамгийн өндөр оноог багтаа авсан байна.
"Улаанбаатарын унаганууд" багийн анхны тоглолт
2021.11.30-ны өдрийн 1 дэх тоглолтонд СЭЗИС-ийн багт 82-73 харьцаагаар хожигдсон. Уг тоглолтонд оюутан Б.Бямбадэлэг (24 оноо), Ц.Амар-Отгон (21 оноо) нар хамгийн өндөр оноог багтаа авсан байна.
Эх сурвалж: Монголын Оюутны Сагсан бөмбөгийн Холбооны албан ёсны фэйж хуудас